XIII Concurso de Fotografía

“No peirao”

Museo Liste - Etnográfico de Vigo

2026

Bases

1. Aspectos xerais:XIII Concurso de Fotografía convocado polo Museo Liste de Vigo co gallo da celebración do Día Internacional dos Museos (18 de maio). O concurso pretende fomentar o coñecemento e a creatividade a través da práctica da fotografía co fin de destacar variados aspectos históricos, artísticos, etnográficos e antropolóxicos.

As fotografías a concurso serán valoradas atendendo, principalmente, a tres criterios:

• Estético: valorarase a beleza da fotografía e a sensibilidade á hora de recoller certos aspectos que singularicen e dignifiquen o elemento fotografado.
• Técnico: valoraranse aspectos asociados á técnica desta arte.
• Documental: valorarase que as fotografías presentadas acaden o valor de documento gráfico como forma de recoller e difundir coñecemento.

2. Temática: “No peirao”: a nosa proposta temática ten como protagonista o porto, elemento construtivo que vencella mar e terra; refuxio e meta para os que chegan; lembranza futura para os que parten; e, como non, fervedoiro de tarefas cotiás: a descarga de peixe, o arranxo dos aparellos, a construción naval, a pesca deportiva, o transporte de pasaxeiros, o deporte, … A súa realidade nos sitúa, a súa simboloxía nos motiva e agardamos que sexa para vós, fotógrafas e fotógrafos, un tema que convide a captar a súa alma.
3. Prazo de recepción das obras: dende o 1 de febreiro ata o 21 de abril de 2026.
4. Participantes e número de obras: maiores de 18 anos cun número máximo de tres fotografías presentadas por persoa, se ben nunca recaerán dous premios no mesmo participante.
5. Presentación das obras, identificación e envío:

• Han de ser fotografías realizadas ex profeso para o concurso, debendo ser orixinais, inéditas e non presentadas nin premiadas previamente en ningún concurso e manterán esta condición ata o remate do proceso concursal. Quedarán excluídas as fotografías que non conserven os datos que permitan verificar a súa data de captura.
• O tamaño da fotografía deberá ser de 30 x 20 cm., cunha resolución mínima de 300 puntos por polgada e en formato jpeg (poderá ser requirido o formato RAW se fora necesaria comprobación do cumprimento destas bases). Non se admitirán fotomontaxes. Tampouco se admitirán fotografías firmadas, con bordes ou marcos.
• As fotografías serán enviadas por correo electrónico en arquivos adxuntos de xeito individual (un arquivo adxunto por fotografía). O nome do arquivo adxunto será o título da fotografía. No corpo da mensaxe especificaranse os datos do participante que deberán incluír: nome e apelidos; enderezo postal (domicilio, código postal, poboación e provincia); enderezo de correo electrónico e teléfono de contacto, así como o título da obra que, como se refire anteriormente, tamén se fará constar no título do arquivo adxunto.
• O enderezo de envío é : didactica@museoliste.org. Confirmarase recepción.
• Os autores responsabilizaranse da autoría e orixinalidade das obras presentadas, de que non existan dereitos de terceiros sobre as mesmas e de calquera reclamación que por dereitos de imaxe puidera formularse. A este respecto, será necesario cumprimentar un formulario que se poderá descargar desde a dirección https://museoliste.org/blog/ e que se enviará firmado, a través de calquera medio, sempre que nas fotografías figuren persoas recoñecibles ou lugares para o que sexa preceptiva a petición de permiso de fotografado.
• É imprescindible o cumprimento das presentes bases sendo responsabilidade do autor que as obras se axusten a elas. O Museo non responderá consultas sobre a pertinencia das obras enviadas en canto a formatos, temática e outras cuestións que só o xurado analizará no momento da resolución do concurso.

6. Selección de obras, xurado e fallo: o xurado encargado de seleccionar as obras gañadoras estará formado por varios expertos en fotografía, un experto en etnografía e patrimonio, un membro do padroado da Fundación Liste e un membro do persoal técnico do museo. O fallo do xurado será comunicado aos gañadores vía telefónica e publicado no blog do museo (https://museoliste.org/blog/) e en prensa a partir do 7 de maio de 2026.
7. Premios: establécense 3 premios. Un primeiro premio dotado con 200 euros en metálico e dous premios máis que recibirán unha figura conmemorativa.

A entrega de premios realizarase o día 17 de maio, “Día das Letras Galegas”, a partir das 12:30 h. na sede do Museo.

8. Outros:

• Cesión dos dereitos de reprodución e difusión das fotografías presentadas sempre que se mencione o autor e teña como fin a divulgación e promoción cultural e, en calquera caso, sen ningún tipo de beneficio económico.
• O feito de participar implica a aceptación íntegra das presentes bases  e, en caso de existir algunha discrepancia na súa interpretación ou valoración, prevalecerá o criterio do Museo.
• En todo aquilo non previsto nesta bases a Fundación Liste – Museo Etnográfico de Vigo resolverá o que proceda.

9. Información: a través do teléfono 986244698 ou a través do enderezo didactica@museoliste.org.